انا نازل بكرة 27 مايو وههتف فى التحرير زى ما الناس هتهتف واكيد مش هحاول اهتف هتاف الناس مبتهتفوش عشان ما اترميش برة وانا مقتنع بكل مطالب الناس بكرة ومعاها
اما رأيى انا بقى والى انا عارف انه مش مرُحب بيه بكرة فده موضوع كبير
انا عايز مجلس رئاسى , وعايز دستور جديد . لكن بقول تانى اهه اكيد مش ههتف كدا بكرة لان محدش هيسمعلى , طبعاً صوابعك بتاكلك وعايز على طول تكتب وتقولى الاستفتاء , الديمقراطية , الشعب قال كلمته والكلمتين الفكسانين الى الناس حفاظها دى
اولاُ : المجلس الرئاسى لا علاقه له اطلاقاً بالاستفتاء الاهطل المجلس العسكرى عمله دة , يعنى احنا مقولناش نعم للجيش زى ما ممدوح شاهين قال , انت ربما تختلف معايا فى موضوع المجلس الرئاسى لكن لا تتهمنى بخيانة الشعب والديمقراطية والكلام الكبير دة
وعلى فكرة انا معنديش مشكلة ان المجلس العسكرى يكمل الفترة الانتقالية , بشرط اشوف محاكمات حقيقية وخطوات اصلاح حقيقة وتعامل فيه شفافية وحوار وطنى حقيقى , وضمانة عدم اجراء اى صفقات مشبوهة مع احد التيارات السياسية دون الاخرى , واستجابة لاراء الشعب ونشوف ثورة حقيقية فى البلد فى كل حاجة مش كلمة مذيع القناة الاولى الاهطل عمال يقول فيها طول اليوم
ثانياً : الدستور . انا مع وضع الدستور من خلال لجنة تأسيسية قبل انتخابات مجلس الشعب , ايوة انا عيل سيس وقولت لا وفى الاخر برفض الديمقراطية
ديمقراطية اية الى انت بتقول عليها , فين الديمقراطية لما تكون الانتخابات بعد 3 اشهر ومفيش اى فصيل سياسى فى الشارع مستعد غير الاخوان
ديمقراطية اية لما تخلى الاخوان الى هما بيقولوا ( لا نتعترف بمسلم ليبرالى او علمانى او يسارى ) يحطوا الدستور الى هيتحكم فى شكل الدولة ال 50 سنة الجايين
ديمقراطية اية دى الى تخلى الناس تقول نعم لتعديل 9 مواد فى دستور 71 بارقامهم ومرة واحدة يلاقوا بين يوم وليلة طلع اعلان دستورى من 63 مادة مليانين مواد مصيرية الشعب مقلش نعم عليها
نعم . نعم . نعم . نعم , الكلمة دى فقعتلى كل ما يمكن فقعه فى البنى ادم
نعم بقت لكل حاجة نعم للمجلس العسكرى , الشعب اختار المجلس العسكرى . نعم للاعلان الدستورى , نعم للتعديلات , نعم للانتخابات فى مواعيدها , نعــــــــــــــــــــــــــــــــــــم للدين والى مش عاجبة يسيب البلد
الشعب قال نعـــــــــــــــــــــــــــــــــــــــــــــــم , شعب مين يا ولاد الوارمة , الناس الى طلعت تنصر الدين وتنقذ المادة التانية من ايد العلمانيين والشيوعيين الكفرة ولاد دين الكلب , نعم اية دى ؟
لو كان هو دة مفهومكوا عن الديمقراطية اعذرونى انتوا متفهموش حاجة
على بلاطة الدنيا وضحت انهاردة لما الجيش صرح انه يسعى لوضع مادة فى الدستور تحمى الجيش من الرئيس القادم , ساعتها صدقت الى كان بيدور فى دماغى وعرفت انى كنت بفكر صح
الجيش قايض الاخوان . كرسى المجلس مقابل سلامة اعضاء المجلس العسكرى وعدم محاكمتهم بعد مجئ الرئيس القادم طبعاً انا مش هتكلم عن الى مخلى اعضاء المجلس خايفيين , ويكليكس قالت كلمتها من قبل الثورة حتى . واشمعنه الاخوان - لان الاخوان هما الفصيل الوحيد الى مستعد يبيع اى حاجة , اى حاجة مقابل الكرسى
ملحوظة : لو الجيش اعلن تأجيل الانتخابات مدة سنة مثلاً حتى استعداد القوى الوطنية لتشكيل مجلس متكافئ يعبر عن الشعب ويمثله معظم مشاكلى دى هتتحل
