ثورة تايهة يا ولاد الحلال

سبحان الله , انا وانا بفكر اكتب التدوينة دى اترددت كتير , خفت بالظبط زى ما كنت بخاف قبل كدا من امن الدولة لا يكونوا بيشوفوا نشاطنا عالنت او تدويناتنا وكدا .... كنت هقوم ومش هكتب حاجة , بس لقيت نفسى بقول اية دة ؟؟؟؟؟
دة كان فى ثورة ......

كان فى ناس ماتت عشان نعرف نكتب ونقول , ناس دمها سال فى الارض وهى بتهتف كلمة واحدة " حرية " ازاى انا خايف اكتب ,خايف لا يحصل معايا زى مايكل نبيل او بثينة كامل الى اتحقق معاه

ا او شباب الثورة الى بيتقطع بث التلفزيون عليهم وهما بيتكلموا
وكل دة بتهمة التشكيك فى المؤسسة العسكرية والتحريض عليها والهجوم , دة اية دة , امال هى اية الثورة دى , لما نشيل صنم مبارك ونحط اصنام تانى مش بتراقب وتضايق بس , لا دى كمان بتدى احكام عسكرية
كان الاول فى مجلس شعب فاسد ومزور بيطلّع القوانين ملهاش دعوة بالشارع ولا راجل الشارع ومكنش حد هيقدر يتكلم لان كله بالديمقراطية , كله بالانتخابات , كله بالانون

دلوقتى مفيش مجلس والقانون بينزل زى الوحى من فوق من ابانا الذى فى المجلس العسكرى ومحدش يقدر يقول غير امين , امال ثورة اية دى ..؟

وادى اخرها امبارح ..... بقينا عناصر خارجية بتحرض عالجيش وهدفها زعزعة استقرار الوطن مش ناقص غير كنتاكى وعبد اللطيف المناوى والمذيع الى بينام على القناة الاولى وتبقى كملت

ايوة صح وتامر بتاع غمرة

انا مش حاسس بالتغيير ,لانى لسه خايف اكتب , انا مش حاسس بالتغيير لانى لسه خايف على مصير مصر ومش عارف بكرة مخبى اية , انا حاسس ان فى ناس لسة بتكره مصر بعد الثورة , انا حاسس ان فى ناس لسه حاسة انها مظلومة وهتفضل مظلومة

طب ازاى امال فين الثورة فين الفرحة والنشوى الى كنا فيها لما بنسع الاغانى الوطنية بعد ما مبارك اتنحى

ليه حاسس ان الامل بيدبل تانى , او بيفكر يدبل تانى

ليه فى ناس اتضربيت بالنار يوم 9 مارس , وناس اتضربت بالرصاص عند سفارة اسرائيل , وناس اتقبض عليها , ليه شباب الثورة بيتحاكموا عسكرى , وكلاب مبارك ومحرضين الفتنة الطائفية بيتحاك

موا مدنى

طب ليه الجيش معاه رصاص يضرب رامى فخرى ويضرب شباب الانتفاضة عند السفارة ومعوش رصاص يحمى كنيسة امبابة ويمنع المجزرة

دور معايا ع الثورة , لان يظهر اننا نسينها المرة الى فاتت فى التحرير

احنا ننزل التحرير تانى وندور على الثورة

ثورة تايهة يا ولاد الحلال