مسيحية الكراهية

علمونى الخدام فى الكنيسة , وابويا وامى فى البيت , ومدرسين الدين فى طرقات المدرسة , ان الى يضربى لازم اقوله " الله يسامحك " , وما اردلوش الضربة بضربة , وقالولى ان المسيح قال : "من لطمك على خدك الايمن حول له الاخر" ,وعلمنى البعض الجملة دى برده بعد ما اضاف ليها شوية تحابيش بانى لما اقول للى ضربنى ربنا يسامحك , ربنا هيكافأنى انا ويعاقب الى ضربنى (

صفقة مربحة )0

ولكن كطفل الكلام كان غريب عليا قوى , ومش فادر اقولكوا شغل تفكيرى قد اية سألت تانى : الى يضربنى اقوله الله يسامحك ؟!! ,طب واخد حقى ازاى

لكن تقريبا حصلت على نفس الاجابة من الجميع , ولان كانت راسى ساعتها ورقة بيضه للاسف , خدت الفكرة زى ما هيا , وحفظتها وسمعتها واكدت عليها ومرديتش اناقش نفسى فيها لان ابونا فى الكنيسة قال كدا والخدام قالوا كدا , وبابا وماما قالوا كدا ومستر الدين قال كدا, يعنى انا هعرف احسن من دول

وبدأت من هنا رحلتى مع اللطم , اللطم على الخد الايمن والايسر والقفا , القفا بقى للى ميعرفوش هو نوع من انواع

اللطم لكن على اسفل مؤخرة الرأس

رحلة اللطم دى بيتعرضلها اى شاب فى حياته الدراسية فى مدارسنا المصرية وكله يعرفها اكيد بالانواع الى ذكرتها الى جانب ابتكارات جديدة زى "الكشاف" وخلافه , وانا مش حاسس بحرج وانا بحكيها لانكوا لازم تعرفوا

القفا كان هوا اصعب انواع اللطم نفسياً اكتر منه بدنياً ودة تعرضلته كتير فى مرحلة الابتدائى والاعدادى , وطبعاً مع بداية تعرضى لللطم دة , افتكرت كلام الناس الى فوق دى كلها , وافتكرت المسيح وكلامه الى قاله , وبالتالى قلت : الله يسامحك

والله يسامحهم بقى زمايلى دول عرفوا انى مش هرد الضربة بضربة وانى بسامح , وبالتالى صرت انا مقفأة المدرسة لغايت الحمد لله ما دخلت ثانوى وتخلصت من شله العيال السيس دول

حكايتى عن موضوع القفا دة ربما قدامك دلوقتى سطر او كام كلمة بتقراهم ويمكن بتضحك فى سرك لكن هنكد عليك لما اقولك ان الموضوع دة كان اصعب الحاجات الى مرت عليا فى حياتى , وسابت اثر نقسى جامد جداً فيا , شعور مؤلم لما تكون " هفأ "

شعور مؤلم لما تتعرض للاهانة على الفاضى وعلى المليان , ولما تعترض او تحاول تمنع الى بيهينك بيسكت , لكنه بيرجع تانى ويهينك لانه متأكد انك مش هتردله الضربة , شعور كفيل يخليك تفقد الثقه فى نفسك لابعد الحدود , وصعب حد يقدره او اوصفه

لكن هتستغربوا لما اقول انى مش فاكر الاهانة دى , ومش مسببالى الم , ونظرى مضعفش ولاحاجة , لكن حاجة واحدة بس هيا الى باقية جوايا الكراهية , كل الى فاكرة لزامايلى دول الكراهية رغم انهم يكمن كانوا اطفال , ويمكن قضيت معاهم زمان اوقات حلوة لكن الى انطبع فى ذاكرتى كرهى ليهم

فوق فقد الثقة بقى , ولان عدد الخناقات الى اتانقتها فى حياتى كانوا 3 تقريبا وانا عمرى 19 سنه يعنى بمعدل خناقة كل 6 سنين , فانا افشل من فأر فى فن الدفاع عن النفس , مش جبان , والتلت خناقات كان معظمهم عض

وبالتالى ف احياناً لما بفكر او بتخيل انى مثلا ماشى مع مراتى فى شارع ضلمة وطلع علينا 4 وحاولوا يخطفوها منى ويغتصبوها مثلا ً , هل هعرف ادافع عنها , ولا اسيبهم يخدوها واتصل بالبوليس , ولا اقولهم خدونى انا وسيبوها هى

م انا كدة فيا حاجة غلط , ولازم اعرف مين السبب , طب مين هل المسيح الى قال من لطمك.... – حاشا- طب مين ؟

الى اكتشفته ان اكيد الناس الى فسرتلى كلمة المسيح دول هما السبب , اكيد المسيح قصد حاجة تانى غير دى غير الى اتربيت عليه وغير الى اتزرع فى دماغى , اكيد المسيح لما دعى للتسامح مكنش يقصدها بالطريقة الى انا كنت فيها دى ولسة بعانى من اثارها للنهاردة

واتأكدت ان فعلا الناس الى علمونى التسامح علموهونى غلط , اتأكدت لما عرفت ان المسيح لما العبد لطمه على وجهه محولوش الناحية التانية لكن قاله : ان كنت قد تكلمت ردياً فاشهد على الردى وان حسناً فلماذا تضربنى ؟

كمان لما عرفت ان بولس استخدم القانون وطلب محاكمة عادلة من قبل قيصر روما للخروج ليمنع الجنود من جلده دون وجه حق

لما عرفت ان ربنا امر موسى انه يروح لفرعون ويطالبه بحقوق اليهود فى الخروج من مصر

وانا ربنا امر اليهود انهم يخرجوا عن عبودية فرعون ويهربوا خارج مصر حيث وعدهم بارض جديد

وشفت ان النبى نحميا لما "هزاوا بنا واحتقرونا وقالوا ما هذا الامر الذي انتم عاملون اعلى الملك تتمردون. 20 فاجبتهم وقلت لهم ان اله السماء يعطينا النجاح ونحن عبيده نقوم ونبني.واما انتم فليس لكم نصيب ولا حق ولا ذكر في اورشليم. (سفر نحميا الإصحاح الثانى"

وغير كدة اتأكدت كمان لما حللت الى احنا بقينا فيه دلوقتى , لما لقيت ان المسحيين فى كل مكان معظمهم بيستخدم المبدأ دة فى الحياة وبيتعامل مع اللطم زيى بالظبظ واحياناً اوحش , بل انهم احياناً بيتشددوا لارائهم , وبيأكدوا اننا غلط نتطالب بحقوقنا , واننا غلط نطالب بالقوانين الارضية

هو حل سهل ومريح , لكنه غلط , الكنيسة والخدام والتربية الغلط الى نشرت فى دماغ المسيحى ان البحث عن الحق خطأ , وان المسيحى لا ينبغى ان يسعى وراء حقوقه لانى مش من العالم – زرعت فى الناس مصيبة ومرض علاجه هيحتاج سنين

لما موظف يتحرم من ترقية بسبب دينه ورغم كدا ميطالبش بحقه ويسكت لان " الرب يدافع عنكم وانتم تصمتون "

لما ناس تأكد ان الوقفات الصامته او التظاهرات حرام , لان ربنا هيجيبلنا حقنا

لما ناس تتطلب منى انى ما اتكلمش عن مشاكل الاقباط وانى احسنلى اصلى

لما يختفى الاقباط من الحياة السياسية المصرية ومن المطالبة بحقوقهم المشروعة ويكتفوا ان الكنيسة بتعمل كدا

لما مسيحى يقوله واحد مسلم متيجى تصلى معانا فيبصله المسيحى ويضحك

لما تحصل مئات الحوادث الطائفية من 50 سنه وميتحكمش على ولا واحد عمل حادثة منهم باعدام غير فى 2011 والناس ساكته

كل دة عارفين بيعمل اية , بيحفر فى دماغهم نفس الى اتحفر فى دماغى نحاية زمايلى بتوع ابتدائى , بيحفر الكراهية , وبيغذيها

الصمت دة وراة كره , وراه فى كل بيت كراهية وخوف وحقد شماتة فى اى ابتلاء للى سبب للمسيحى مشكلته , وراه انسان بيعلل نفسه بانه هيشوف الى ظلموه دول بيتحرقوا فى نار لا تهدأ وهو بينعم فى الفردوس

عذراً احبائى الصامتون عذراً ايها الخدام , عذراً ايها الكهنة عذراً الى كل من ربانى هكذا والى من كان السبب فيما فيه المسحيون الان

ما ربيتونا عليه ليست هي مسيحية التسامح , لكنها مسيحيية الكراهية

وحاشا ان تكون الكراهية من المسحية ولكنكم من فعل هكذا

انتم من افقد الاقباط ثقتهم بانفسه كما فقد انا الثقة بنفسى

انت من زرعتوا الكراهية بدعوتكم للسلبية وكنتم السبب فى عزل الاقباط

فادى فتحى

18.1.2011

5:00am